| 預訂票搶購一空 古巨基爆個唱玩空中飛人 
記得當年為了讓古巨基重返樂壇，確實花了我不少工夫和時間，要知道，他真的很愛唱歌，放棄他，實在很可惜；結果，古巨基真的沒有令我失望，幾年間的進步，令人興奮。今年再次為基仔開演唱會，無非是想大家知道，他的實力所在，今次特意找基仔談談他在演唱會中的秘密武器及即將推出的新專輯製作流程。
Paco：闊別紅館兩年，今年我再次成功為古巨基爭取檔期開騷，於9月7日至10日在紅館舉行一連四場的《古巨基The Magic Moments演唱會》，雖然門票今日才正式開售，但優先預訂的門票早已售罄，單是這點便讓人興奮。
古巨基：「其實今次個騷同以往的演唱會好唔同，觀眾入場會好似去咗魔幻世界的森林咁，無論係舞台設計、燈光、服飾，甚至編曲方面，都好似舞台劇咁，會有好多嘢喺空中飛來飛去，好有Magic Mood，感覺幾得意，淨係搭台個Budget貴過上次一倍。演唱會海報係我同阿Jan（林海峰）一齊度，為咗增添神秘感，刻意用頂帽遮住雙眼，我諗好少人會好似Paco咁大膽，畀我哋咁玩；至於Product方面，今次就有啲Tee的Graphic係我設計，幫手諗個Idea，其次就有電話繩、帽，全部都好靚。」
力邀公司歌手合作
Paco：05年古巨基在《勁歌金曲演唱會》上，把擔任和音的側田介紹給觀眾認識，結果成功把他帶進樂壇，成為萬眾矚目的新星；時至今日，基仔再次開騷，有幸上台的歌手，豈止側田一個？
古巨基：「嘉賓方面其實都仲傾緊，自己公司有咁多歌手，梗係要請佢哋幫手，我哋全公司係一條心，側田早兩年幫我做和音，如果我哋可以喺演唱會上重遇，都幾感動㗎，同時，我都知道有好多朋友想聽到《愛得太遲》合唱版的現場演繹，但點都要傾傾先知有冇可能；揀歌方面，其實自己的歌真係有好多，好似新派台的《愛回家》，現場唱，感覺會好好，但都想唱下別人的歌，好似《追》呢首歌，唱出來的感覺會好正。」
通過相片 觸動人心
Paco：繼上次《愛得太遲》親自執導拍MV後，今次我特意讓古巨基為自己的專輯拍攝封面，結果他周遊列國，拍下過萬張感人肺腑的照片，並把當中的故事，一五一十地告訴林夕，希望他以歌詞表達出來。
古巨基：「今次個Concept係以人與人之間的微妙感覺為主導，去咗六個國家，遇到好多人同事，除咗影相，我自己同成隊Crew都好主動去認識其他國家的陌生人，目的係想將人與人之間的距離拉近，睇多啲不同事物，雖然每個地方都只係留咗好短時間，但就影咗超過一萬張相，我拎啲相返嚟畀林夕，同佢講咗好多故事，希望佢可以睇完相再寫番個感覺出嚟，我記得喺錄音室錄音時，感覺上多咗好多人情味。」
被阿Mark感動
Paco：今次的專輯裏，古巨基除再次找來老拍檔雷頌德、林夕外，更邀得新加坡著名作曲人Dick Lee幫手，要知道，他的歌曲風格是愈嗒愈有味道的，新作《愛回家》，便細膩描繪男人如何為了家人而拼搏的辛酸感。
古巨基：「我一向都好鍾意Dick Lee的作品，《愛回家》係描寫都市人為了工作而感到很大壓力，把唔開心的感覺積壓在身上，直至返家後，見到錫自己的人在家等自己，便知道一切都不重要，記得在錄歌當日，我和阿Mark傾偈，大家都為生活而各有所煩，面對種種壓力，但當Mark嫂招呼我哋埋位食飯時，我見到阿Mark面上流露出一絲幸福笑容，個晝面好溫馨，然後我就明白到，我就係要呢種感覺。」
主持：黃柏高 |
留言列表
